БИШКЕК, 7-май — Sputnik. Өлкө башчысы Алмазбек Атамбаев Кыргыз радиосун 85 жылдык маарекеси менен куттуктады. Бул тууралуу президенттин маалымат кызматы билдирди.
Өлкө башчы өз куттуктоосунда 1931-жылы уюшулган республикалык радио комитет Кыргыз мамлекетинин тарыхы менен тыгыз байланышта өнүгүп-өсүп келатканын айтып, улуттук радиожурналистика да ошол кезден башат алып, кыргыз үнү ободон өз ордун ээлегендигин баса белгилейт.
"Эгер алгачкы жылдары радиобуз улуттун сабатын ачканга, маданий жана руханий мурасын жандандырганга салымын кошсо, Улуу Ата Мекендик согуш жылдары элдин көзү да, кулагы да, кат ташыган көгүчкөнү катары да кызмат кылган", — деп айтылат президенттин куттуктоосунда.
Атамбаев быйылкы "Тарых жана маданият" жылында Кыргыз радиосунун таланттарга бай үй-бүлөсү ата-бабалар мурасын арттырууга зор салымын кошооруна үмүттөнөөрүн айтат.
"Кыргыз радиосу — элдик көөнөргүс казынанын уюткусу, ордосу. Радионун "Алтын казынасында" 12 миӊ сааттан ашык залкар чыгармалар, Саякбай, Карамолдо, Атай, Муса, Айтматов, Сыдыкбеков, Миңжылкыев сындуу улут сыймыктарынын асыл мурастары таберик болуп сакталып турат", — деди Атамбаев.
Кыргызстанда радио түйүндөр 1927-жылы иштей баштаган, 1931-жылы 19-декабрда Кыргыз АССРинин Элдик Комиссарлар Советинин алдында Радиокомитет уюштурулган. Бул дата Кыргыз телерадиосунун түптөлгөн күнү болуп эсептелет.
