БИШКЕК, 7-май — Sputnik. Борбор калаада эски китептердин фестивалы өтөөрүн муфтияттын маалымат кызматы билдирди.
Иш чара "Тарых жана маданият" жылынын алкагында жана Кыргызстандын маданиятын, тилин, салттуу руханий баалуулуктарын сактоо жана өнүктүрүү максатында өткөрүлөт.
"Кыргызстан мусулмандарынын дин башкармалыгы жана Бишкек шаардык казыяты калаа тургундарын жана конокторун 8-май күнү саат 14:00до борбордук мечитте боло турган эски китептердин фестивалына чакырат", — деп айтылат маалыматта.
Ар бир жаран кылымдардан сакталып келе жаткан ислам динине байланышкан эски кол жазма китептерин, арабча, түркчө шариат маалыматтары камтылган китептерин жана башка ислам баалуулуктары болгон буюм-тайымдарын алып келип, көргөзмөгө катышса болот.
Фестивалдын жүрүшүндө эң эски (басып чыгарылган жылы анык далилдер менен болсо), көлөмү эң чоң, эң оор, эң калың, эң кооз жасалгаланып, таза сакталган, башкалардан өзгөчө, бирок, эң көп томдуу китептер боюнча тандалган китеп ээлерине ыраазычылык баракчалары тапшырылат.
