БИШКЕК, 2-май — Sputnik. Кыргызстандык Аида Робертова Россиянын мода индустриясы боюнча улуттук академиясынын "Золотое веретено" сыйлыгына көрсөтүлдү.
Сыйлыкты тапшыруу салтанаты үстүбүздөгү жылдын 25-ноябрында Сочиде өтөт. Мындан сырткары, 20-октябрда өтө турган Mercedes Benz Fashion Week Russia аталышындагы көргөзмөдө Робертова өзүнүн коллекциясын көрсөтөт.
Жаш модельердин айтымында, кийим дизайны боюнча беш жылдан бери алектенип келет. Ал эми профессионалдык деңгээлге өткөнүнө бир жыл болгон.
"Менин эмгектерим көбүнчөсү япон стилин элестетет. Кийимдер тыкан жана ыңгайлуу. Мындай саркеч кийимдер Кыргызстанда жактырылбашы мүмкүн. Бирок, Москва эли кенен кийимдерди кийүүнү каалашат", — дейт жаш модельер.
Анын айтымында, москвалыктардын арасында коллекцияга кызыккандардын саны өсүп баштаган.
Учурда Робертова Вячеслав Зайцевдин мода Лабораториясында дизайнер-модельер багытында билим алып жатат. Буга чейин Кыргызстан-Россия славян университетинин коледжинде модельер-конструктор кесибин аяктаган.
