БИШКЕК, 28-апр. — Sputnik. Башкы прокуратура, УКМК, ИИМ жана Экономикалык кылмыштуулукка каршы мамлекеттик кызмат "Кумтөр Голд Компани" ишканасында тинтүү жүргүзүп жатат. Бул тууралуу Башкы прокуратура билдирди.
Маалыматка ылайык, мындай аракет компаниянын каражаттарын жана активдерин мыйзамсыз чыгаруусуна байланыштуу козголгон кылмыш иштин алкагында жүргүзүлүп жатат.
Билдирүүдө муну менен бирге жакын арада "Кумтөр Голд Компани" ишканасынын жетекчилиги жана башка кызматкерлеринин катышуусу менен тергөө амалдары жүргүзүлө турганы айтылат.
"Кумтөр" компаниясында иштегендер бет капчан адамдар саат 16.00дөн кийин келип, тинтүү учурунда эки саат бою эч кимди сыртка чыгарбай имарат ичинде кармап турганын айтышты. Алар телефон менен сүйлөшпөөгө, компьютерлерди өчүрүүнү талап кылышкан. Кызматкерлердин айтымында, аларга тинтүүнүн максаты түшүндүрүлгөн эмес. Учурда кызматкерлердин жарымы коё берилди.
"Кумтөр" алтын кенинин акциясына Centerra Gold Inc. компаниясы 100 пайыз ээлик кылат. 2009-жылдагы макулдашууга ылайык, компаниянын акциясынын 33 пайызы Кыргызстанга таандык. Centerra Gold Inc. Кыргызстан жана Монголияда жайгашкан эки алтын кендин ээси болуп саналат.
