БИШКЕК, 28-апр. — Sputnik. Айланма жолдогу жол кырсыгынан каза тапкан аял "Тазалык" ишканасынын айдоочусунун жубайы экенин муниципалдык мекеменин инженери Бакай Сулайманкулов билдирди.
Шаршемби күнү Бишкек — Нарын — Торугарт трассасынын айланма жолунда жүк ташуучу унаа менен фура сүзүшкөн. Кырсык болжол менен саат 16.20да болгон. Анын кесепетинен жүк ташуучу унаада келе жаткан аял каза болгону маалымдалган. Ал эми ГАЗ-53 унаасы "Тазалык" муниципалдык ишканасына тиешелүү болуп чыккан.
"57-жаштагы айдоочу иш күнү аяктагандан кийин үйүнө жөнөгөн. Ал Маевка районундагы киоскиде соода кылган жубайын ала кеткен. Фуранын айдоочусу өз жол тилкесинен чыгып, Москвичтен ашып өтүүнү көздөгөн. Мындан улам унаалар кагылышып, кызматкерибиздин жубайы көз жумду", — деп билдирет Сулайманкулов.
Чүй облустук ички иштер башкармалыгынын кайгуул милициясы фуранын айдоочусу 29 жашта экенин билдиришти. Ал "Караван Транс" аттуу менчик мекемеде айдоочу болуп иштей турганы маалым болгон.
Учурда кырсык боюнча соттук медициналык жана техникалык экспертиза жүргүзүлүп жатат. Тергөө иштери уланууда.
