Милиция кызматкерлери шаарда машиналарды кууганга акысы барбы?

БИШКЕК, 27-апр. — Sputnik. Белгилүү юрист Владимир Плужниктин айтымында, кайгуул милициясы артынан кууган Volkswagen Touareg автоунаасынын айдоочусу келтирилген бардык чыгымдарды төлөөгө милдеттендирилиши мүмкүн.

26-апрелде Кайгуул милиция башкармалыгынын (КМБ) атайын машинасы Volkswagen Touareg үлгүсүндөгү автоунааны "Аламүдүн-1" кичи районунан кууп баратып, Volkswagen Passat автоунаасы менен кагышкан. Экинчи машина милициянын автоунаасын өткөрбөй койгон. Маалыматка ылайык, жол тандабастын (мамлекеттик номери B 08 55 AR) айдоочусу КМБнын өкүлдөрүнүн токтоткон буйругуна баш ийбей койгон.

"Эгер жол тандабастын айдоочусунун күнөөсү далилденсе, ал жол кырсыгына кабылган кайгуул милициясынын автоунаасын жана Volkswagen Passat машинасын калыбына келтирип берүүгө милдеттендирилиши мүмкүн", — деди ал.

Анын айтымында, ким күнөөлүү экенин эми Бишкек ИИББдин Кайгуул милиция башкармалыгы аныкташ керек.

"Ички иштер органдарынын буйругуна баш ийбегени үчүн Volkswagen Touareg үлгүсүндөгү машинанын айдоочусу 15 суткага камакка алынышы мүмкүн", — дейт юрист.

Адис ошондой эле ички иштер органдарынын өкүлдөрү кандай гана убакыт болбосун мыйзам бузган же кылмыш жасоого шектелген жаранды кууганга укугу бар экенин белгиледи.

Кайгуул милициясы кууган жол тандабас — видеожетондон алынган кадрларды Sputnik Кыргызстан агентигинин видеосунан көрүңүздөр>>