БИШКЕК, 27-апр. — Sputnik. Бишкек шаары боюнча бир ай ичинде 4001 авариялык абалдагы бак аныкталганын Sputnik Кыргызстан агенттигине мэрия билдирди.
Буга чейин борбор калаа башчысы Албек Ибраимов 27-апрелге чейин куураган бактарды кыюу боюнча тапшырма берген. Мындай аракет шаардын чок ортосунда бактын кулашынан адам өлүп, эки унаа жабыркагандан кийин көрүлүп жатат.
Бак-дарактарды инвентаризациялоо иш-чарасы 30-мартта башталып, жалпы жонунан 61 миң 40 бак текшерилип чыккан. Мында 4 миң дарак кооптуу деп табылып, ушу тапта анын 170и кыйылды. Мындан тышкары, 22 бак буталган.
Кооптуулук жараткан бактарды аныктоо боюнча комиссия мэрияга кайрылып, иштин көптүгүнө байланыштуу мөөнөттү 20-июнга чейин узартууну өтүндү.
Андан сырткары, "Зеленстрой" муниципалдык ишканасы калаадагы төрт район администрацияларынын социалдык коргоо бөлүмдөрүнө отунга муктаж адамдардын тизмесин берүүнү өтүнгөн кат жолдогон.
