БИШКЕК, 22-апр. — Sputnik. Талас облусунун Манас районундагы "Чоң-Капка" көзөмөл-өткөрүү жайынан ыктыярдуу патенти жок туруп ЕАЭБ өлкөлөрүнө жүк ташып кирген айдоочулар кармалды. Бул тууралуу Мамлекеттик салык кызматы билдирди.
Маалыматка караганда, айдоочулар мамлекеттик көзөмөлдөн өткөндүгү жөнүндө талонду толтуруу учурунда товарлардын иш жүзүндөгү наркын азайтып көрсөтүшкөн.
Кармалган айдоочулар ыктыярдуу патенти жок ун жана өсүмдүк майын ташып келген. Алар 10 тонна ундун баасын 35 миң 416 сом деп көрсөткөн. Тагыраагы, толтурулган талонго ылайык, 1 килограмм ундун баасы 3,5 сомду түзгөн. Ал эми учурда 1 килограмм ундун баасы базарда 25 сомдон кем эмес. Ошондой эле, эки тонна күн карама майынын баасын 10 миң сом деп көрсөткөн. Бул базар баасынан кеминде он эсеге төмөн деп айтылат билдирүүдө.
Салык кызматы чек арадан товарлар ташып өткөн жарандар жана ишкерлердин салыктарды жашырып, белгиленген көлөмдөн азайтып көрсөткөндөрдү үзгүлтүксүз кездештирип жатканын билдирди.
