БИШКЕК, 22-апр. — Sputnik. Мыйзам алдында Жогорку Кеңештин депутаттарынын укугу карапайым калк менен бирдей. Мындай пикиринин эл өкүлү, парламенттин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитетинин төрагасынын орун басары Алмамбет Шыкмаматов Sputnik Кыргызстан агенттигине билдирди.
Эскерте кетсек, эл өкүлү Рыскелди Момбеков бейшемби күнү парламеттин жыйынында ИИМ министри Мелис Турганбаевге кайрылып жатып, Кайгуул милиция кызматкерлери депутаттардын макамын билбей, документтерди текшерип жатат, алар айылдык депутат менен шаардык депутатты айырмалай албайт деп айыптаган.
Шыкмаматовдун айтуусу боюнча, өзүм билемдикке салган депутаттар арбын.
"Ошол үчүн депутаттарды эл жакшы көрбөйт. Мыйзам боюнча Кайгуул милиция кызматкери жол эрежесин бузган депутатты токтотууга укуктуу. Бир гана тинтүү жүргүзө албайт. Рыскелди Момбеков карапайым жигит, ал туура эмес түшүнүп алган окшойт", — дейт ал.
Мыйзам боюнча ал эмес ИИМ башчысы жол эрежесин одоно бузса аны камаганга болоорун, бирок баары кыргызчылыкка такалып жатканын кошумчалады.
