БИШКЕК, 29-мар. — Sputnik. Президент Алмазбек Атамбаев "Түкүрбө!" акциясына кошулуп, аны финансылык жактан колдоо үчүн 50 миң сом бөлдү. Ал президенттик фондудан бөлүнгөн. Бул туурасында мамлекет башчынын маалымат кызматы билдирди.
"Президент ушундай жарандык демилгелер кыргызстандыктардын аң-сезиминде сапаттык өсүүлөр болуп жатканын, өз өлкөсүн, шаарын жана айылын ардактап сүйүү коомдо маанилүү күчкө айланып баратканын күбөлөйт деп эсептейт",— деп жазылат маалыматта.
Белгилей кетсек, буга чейин борбор калаада "Түкүрбө" деген жабыштыргычтар пайда болгон. Аны демилгелеген Бишкек шаарынын тургуну Куштар Мамбеталиев мындай идея ага бир жыл мурда эле келгенин Sputnik Кыргызстан маалымат агенттигине билдирген.
