БИШКЕК, 15-апр. — Sputnik. Борбор калаадагы №25 мектеп быйыл курулуп бүтө турган мектептердин тизмесине киргизилгенин билим берүү жана илим министри Элвира Сариева журналисттердин суроолоруна жооп берип жатып билдирди.
Министрдин айтымында, быйыл борбор калаада негизинен төрт мектептин курулушу башталган. Анын бирөө №25 мектеп болсо калгандары жаңы конуштардагы окуу жайлар.
"Жалпысынан 200гө жакын авариялык абалдагы мектеп бар. Биз биринчи кезекте урап жарабай калган, балдар башка жакта окуп жаткан мектептерди куруп бүтүрүүнү пландап жатабыз. Ошондой эле курулушу башталып, бирок токтоп калган мектептерди да бүтүрүү жагы каралууда. Каржы маселеси такталып чечилсе, булар да ишке ашат", — деди ал.
Сариева Мамлекеттик архитектуралык курулуш агенттиги мурда мектептин бир чарчы метрин 800 доллардан куруп келген болсо, азыр анын баасы 450 долларга чейин арзандаганын айтты. Бул каражатка мектеп мурдагыдай эле сапат менен курулуп жатканын баса белгиледи. Ошондой эле бул акчанын ичине мектептин жабдуулары да камтылганын кошумчалады.
Андан сырткары, Сариева Башкы прокуратура тарабынан 120 бала бакча кайтарылып, алар бүгүнкү күнү өз максатында иштеп жатканын белгиледи.
