БИШКЕК, 15-апр. — Sputnik. Жогорку окуу жайлар окуунун баасы канча болорун өздөрү аныктай турганын билим берүү жана илим министри Элвира Сариева маалымат жыйында билдирди.
Сариева эми жогорку окуу жайга студенттерди тартуу үчүн билим берүү мекемелери өздөрү кызыкдар боло турганын айтты.
"Быйыл университеттерди көп студент бүтөт. Алардын саны бир кыйла азайып, окуу жайлар ортосунда атаандаштык күчөйт. Ошондуктан билим алуунун баасы кескин көбөйөт деген божомолдор жок", — дейт ал.
Министр тилекке каршы, азыр жогорку окуу жайлар сандан сапатка өтүүгө анчейин аракеттерди көрбөй жатканын айтты.
Ал учурда билим берүүнү экспорттоо боюнча өкмөттүн программасы кабыл алынганын белгиледи. Бул программа 2030-жылга чейин эсептелген.
"Кыргызстанга Индия, Түркия, Пакистан, Кытайдан келип окушат. Негизги бөлүктү КМШ мамлекеттеринен келген студенттер түзөт. Акыркы маалыматтар боюнча бизде 13 миң чет элдик студент бар. Алардан жыл сайын 8 миллион долларга чейин акча түшөт. Бул каражат студенттердин окуусуна төлөгөн сумманы жана бул жактагы жашоосуна кеткен акчаны да камтыйт", — деди ал.
Министр ошондой эле,билим берүүнү экспорттоо программасын жакшыртуу үчүн беш айлык мөөнөт берилгенин кошумчалады. Эгер чет элдик студенттерди тартуу боюнча башка мекемелер жардам берсе, алардын санын 3-4 эсеге чейин көтөрүүгө мүмкүн экенин белгиледи.
