БИШКЕК, 15-апр. — Sputnik. Бишкектеги төлөм жүргүзүүчү терминалдардын биринен 199 миң 290 сом уурдады деп шектелген жаран кармалды. Бул тууралуу Ички иштер министринин маалымат кызматы билдирди.
"Тойгонбаев көчөсүндө жайгашкан дүкөндөрдүн бириндеги терминалдан 14-апрель күнү эртең менен саат 08:45 чамасында акча уурдалган", — деп айтылат маалыматта.
Ыкчам иликтөө иштеринин жыйынтыгында кылмышка шектүү 28 жаштагы Бишкек шаарынын тургуну кармалды. Ал уурулук жасоону алдын ала пландаганын моюндаган.
Маалыматка ылайык, шектүү жаран төлөм терминалында инкассатор болуп иштеген. Ал 12-апрелде терминалдын кулпусун атайылап жаппай кетип калган. Эки күндөн кийин келип, болгон акчаны карактап кеткен.
Учурда шектүүгө карата кылмыш жаза кодексинин 164-беренеси (уурулук) боюнча кылмыш иши козголуп, убактылуу кармоочу жайга камалды.
