БИШКЕК, 14-апр. — Sputnik. Мамлекеттик "Жеткиликтүү турак жай" программасынын алкагында жарандар узак мөөнөткө ипотекалык насыя алышууда. Бул тууралуу Sputnik Кыргызстан агенттигине "Мамлекеттик ипотекалык компаниясынын" маалымат кызматы билдирди.
Эреже боюнча каражат өнөктөш банктар аркылуу 15 жылдык мөөнөт менен берилет. Насыянын үстөгү 12-14 пайызды түзөт. Ипотеканы 21 жаштан 65 жашка чейинки жарандар алып, күрөөгө жаңы сатып алынган турак жай коюлат. Ал милдеттүү түрдө камсыздандырылышы шарт.
"Ипотеканы берүү 25-мартта башталган. Азыр тогузунчу кыргызстандык ипотека алууда. Насыя берүүнүн эң төмөнкү суммасы 450 миң сом, ал эми эң көбү 1,5 миллион сомду түзөт. Учурда 7 миллион 627 миң сом берилди", — деп билдирет маалымат кызмат.
Мамлекеттик ипотекалык компания "жеткиликтүү сегменттен" турак-үйлөрдү курууну каржылап, ошондой эле калкты жеткиликтүү ипотека аркылуу турак-жай менен камсыз кылат. Мында турак-жай андан ары сатып алуу укугу менен же ансыз эле убактылуу ижарага берилет.
