БИШКЕК, 31-мар. — Sputnik. Пекиндин өкмөтү туугандары каза болгон шаардыктар маркумду акыркы сапарга узатуунун экологиялык жолун тандоого багыттай турган бир топ иш-чараларды пландап жатат. Бул туурасында Синьхуа маалымат агенттиги жазды.
Пекиндеги Жарандар боюнча иш алып барган администрациянын өкүлү Ли Хуэй бул багытта атайын иштер жүргүзүлүп баштагандыгын билдирди.
Анын айтымында, шаардыктарга каза болгон жакындарын көмүү үчүн чакан жер алууга же акыркы сапарга узатуунун экологиялык жолун тандай тургандай шарттар сунушталмакчы. Ал — киши каза болгондон кийин сөөгүн өрттөп, күлүн деңиздин үстүнө же дарактардын түбүнө чачып жиберүү жолу.
"Бул жер жетишпегендиктен жана шаардын айлана-чөйрөсүн булгануудан сакташ үчүн жасалып жатат", — деген Ли Хуэй.
Синьхуа 2015-жылы пекиндиктердин 46 пайызы маркумду акыркы сапарга узатуунун экологиялык таза жолун тандагандыгын билдирди. Өкмөт бул көрсөткүчтү 2020-жылы 50 пайызга жеткирүүнү жана сөөктү өрттөөнүн сапатын жакшыртууну көздөп жатат.
Февралдын аягында өлкөнүн тогуз ведомствосу маркумду акыркы сапарга узатуунун экологиялык жолунун эрежелерин жарыялады. Документте өлгөн кишинин жакындары аны экологияга зыян кылбай жайына берүүгө милдеттүү экендиги айтылган. Дагы бир талап — алар жаңы тартипти сакташы керек, тагыраагы, жакынын көмүүгө жердин чакан гана бөлүгүн тандашы зарыл. Ал эми эрежелерди сактабагандар, жазаланаары белгиленген.
