БИШКЕК, 22-мар. — Sputnik. Кыргызстандын бир да сантиметр жери эч кимге берилбей турганын премьер-министр Темир Сариев Ала-Бука районунун эли менен жолугушуу учурунда билдирди.
Өкмөт башчы өлкөнүн бүтүндүгүн жана кол тийбестигин сактоо үчүн бардык аракеттер көрүлөрүн убада кылды.
"Биздин өлкөнүн бир сантиметр жери эч кимге берилбейт. Бул – президенттин, өкмөттүн так, ачык позициясы. Колубуздагы документтердин негизинде сүйлөшүүлөрдү жүргүзөбүз", — деди Сариев.
Ошол эле учурда премьер-министр чек ара маселеси эки мамлекеттин ортосундагы макулдашуу менен чечилерин билдирип, буга этияттык менен мамиле кылуу зарылдыгын белгиледи.
Сариев чек ара тилкелерин тактоо маселеси эки өлкө ортосундагы макулдашуу менен аныкталган документтерге негизделиши керектигин айтып өттү.
