БИШКЕК, 19-мар. — Sputnik. Кыргызстандык эркин күрөш боюнча балбан Магомед Мусаев Астанада өткөн эл аралык турнирде алтын медалга ээ болду.
Эркин, грек-рим жана кыз-келиндер арасында күрөш боюнча лицензиялык эл аралык турнир Казакстандын Астана (Казакстан) шаарында өтүүдө. Ага Кыргызстандан 17 балбан катышууда.
97 килограмм салмак категориясы боюнча күч сынашкан Магомед Мусаев финалдык беттеште казакстандык Мамед Ибрагимов менен кармашты. Биринчи таймда кыргызстандык спортчу 2:0 эсебинде утулган, бирок, экинчи таймда казакстандык балбанды 3:2 эсебинде утуп, чемпион болду.
Буга чейин алтын медалды Айсулуу Тыныбекова менен Жанарбек Кенжеев алган. Ошондой эле Астанада өткөн эл аралык лицензиялык турнирде кыргызстандык төрт балбан Рио-де-Жанейродо өтчү Олимпиадага жолдомо алышкан.
Кырызстан былтыр төрт лицензия уткан. Жалпысынан кыргызстандык спортчуларда сегиз жолдомо бар. Жайкы Олимпиадалык оюндар 5-21-август күндөрү Бразилиянын Рио-де-Жанейро шаарында өтөт.
