БИШКЕК, 18-мар. — Sputnik. Борбор калаадагы Жылуулук электр станциясында (ТЭЦ) 17-мартта өрт чыгып, эки жаран оор жаракат алган. Бир жарандын денесинин 90 пайызы күйсө, экинчисиники 12 пайызы күйгөн. Бул тууралуу Бишкек шаардык ички иштер башкы башкармалыгы билдирди.
Маалыматка ылайык, болжол менен саат 16.00 чамасында Бишкек шаарынын Свердлов РИИБнин нөөмөт бөлүмүнө Чүй-2 дарегинде жайгашкан Жылуулук электр станциясында (ТЭЦ) өрт чыкты деген маалымат келип түшкөн. ТЭЦтеги №20 "Б" көмүрдү майдалоочу тегирменден белгисиз жагдайлардан өрт чыккан.
"Жылуулук электр станциясынын кызматкерлеринин көргөзмөсүнө ылайык, 17-мартта болжол менен саат 13.10 чамасында №20 "Б" көмүрдү майдалоочу тегирмен жактан катуу үн чыкканын угуп, ал жерге чуркап барышкан. Анын ичинде иштеп жаткан эки киши күйүп калганын көрүп, "тез жардам" кызматын чакырып, өз жетекчилигине билдиришкен", — деп айтылат милиция тараткан билдирүүдө.
Жабыркаган жарандар Бишкек шаарынын №4 ооруканасынын күйүк бөлүмүнө жеткирилген. Ошондой эле №20 көмүрдү майдалоочу тегирмен атайын комиссиянын текшерүүсү токтотулду.
Аталган факты боюнча жабыркагандар алган жаракаттарынын оордугун аныктоо үчүн соттук-медициналык жана өрттехникалык экспертизалар дайындалды.
Шаардык №4 оорукананын башкы дарыгери Алмаз Кубатбеков алып келинген бир жарандын абалы өтө оор, экинчисинин абалы канааттандырарлык экенин Sputnik Кыргызстан маалымат агенттигине билдирди.
