БИШКЕК, 17-мар. — Sputnik. Жогорку Кеңештин вице-спикерлигине 72 добуш менен "Республика — Ата-Журт" фракциясынан Алтынай Өмүрбекова шайланды.
Буга чейин ЖКнын Конституциялык мыйзам, мамлекеттик түзүлүш, сот-укуктук маселелер жана регламент боюнча комитети төраганын орун басарлыгына эки талапкерди жактырган. Бири "Республика — Ата-Журт" фракциясынан Алтынай Өмүрбекова, экинчиси "Бир Бол" фракциясынан Чолпон Жакупова эле.
Добуш берүү жашыруун түрдө жүрүп, Өмүрбекова 72, ал эми Жакупова 41 добуш алды.
Буга чейин төраганын орун басары Бакыт Есенбаева өз ыктыяры менен депутаттык мандатын тапшырып берген. Ал Улуттук энергохолдингдин төрага орун басарлыгына дайындалган.
