БИШКЕК, 16-мар — Sputnik. "Торугарт-автодорожный" көзөмөл пунктунун бажы жана чек ара кызматынын жооптуу кызматкерлерине карата кылмыш иши козголгонун Башкы прокуратура билдирди.
Маалыматка ылайык, үстүбүздөгү жылдын 5-мартында Кытайдан товар жүктөп келе жаткан унаанын айдоочусу аталган пункт аркылуу бажы жана салык төлөмдөрүн төлөбөстөн эч тоскоолдуксуз өлкө аймагына кирген. Унаа Кыргызстандан кармалып, текшерүүгө алынган.
Соода-өнөр жай палатасынын экспертизасына ылайык, декларацияланбаган товардын суммасы 176 миллион 165 миң сомду түзүп, мамлекетке ири көлөмдө зыян келтирилген.
Учурда аталган кызматкерлерге карата Кылмыш жаза кодексинин 304-беренеси ("Кызмат абалынан кыянаттык менен пайдалануу") боюнча кылмыш иши козголуп, тергөө амалдары жүрүп жатат.
