БИШКЕК, 16-мар — Sputnik. Унаанын жаңы ээси эреже бузса, бул үчүн каралган айыптан мурункусу кантип кутулушу керектигин Sputnik Кыргызстан агенттигине ИИМдин Башкы штабынын башчысы Бактыгул Абдыжалиев айтып берди.
"Айып пул чегерилгенден бир ай өткөндөн кийин ага туум эсептелинип, беш жылдын ичинде унаа ээсинен алынат. Мында ал жол эрежесин башка адам бузганын далилдеп бериши зарыл. Адам катка кандайдыр бир реакция жасашы керек. Биз дагы ким менен иштеп жатканыбызды билишибиз кажет. Эгер сизге буга чейин сатып жиберген унааңыз үчүн айып пул тууралуу кат келсе, ИИМдин колл-борборуна кайрылып, эмне себептен унаа юридикалык жактан ээси деп эсептелинген сизге таандык эмес экенин түшүндүрүп беришиңиз керек", — деди Абдыжалиев.
Анын айтымында, мындан ары унаанын тигил же бул жаранга таандык экени тууралуу атайын белги коюлуп, тийиштүү органдар тарабынан анык жол эрежесин бузган айдоочу изделет.
"Унаа ээлеринин 60-70 пайызы машиналарын ишеним кат аркылуу саткандыктарын айтышты. Кыйын абал экенин түшүнүп турабыз, бирок бул бизге зарыл нерсе", — деди ал.
Абдыжалиев унааны кайра каттоонун баасын төмөндөтүүгө негиз жок деп эсептейт, анткени анын каттоо менен ишеним каттын ортосундагы айырма болгону 300 сомду түзөт.
