БИШКЕК, 16-мар. — Sputnik. Москва шаарында 7-марттан 13-мартка чейинки аралыкта белгисиз эки киши кыргыздардын батирлерин тоноп, карактап кеткен. Бул тууралуу КР ИИМдин Россиядагы өкүлү Аскат Алиев өзүнүн фейсбук баракчасына жазды.
Маалыматка ылайык, бир жума ичинде белгисиз жарандар 13-14 батирге чейин киришкен. Бирок, бир да жаран арыз менен кайрылбаганын Алиев белгилейт.
"Жабырлануучулар ар кандай себептер менен арыз жазгандан коркуп жатышат. Жабыр тарткандар эч нерседен коркпой арыз менен кайрылууңарды суранабыз", — дейт ал.
Үйлөргө ууруга кирип жүргөн деп шектелген эки жаран видео байкоого түшүп калган. Аны таанууга жардам бергендердин купуялыгына кепилдик берилерин Алиев баса белгилейт.
