БИШКЕК, 13-мар. – Sputnik. Укук коргоо органдарына кайрылган жарандар ар качан тоскоолдуктарга кабылат. Бул тууралуу Акыйкатчы институтунун маалымат кызматы билдирди.
Милицияга жарандар тарабынан берилген арыз даттанууларды укук коргоочулар анализге алышкан. Жыйынтыгында, укук коргоо органдарынын кызматкерлери шектүүлөрдү кармоо учурунда жана тергөө амалдарын жүргүзүүдө туура эмес ыкмаларды колдонушарын аныкташкан. Мындан сырткары жарандар жабырлануучулардын укуктары көпчүлүк учурда корголбой калып жатканын акыйкатчыга билдиришкен.
"Элден түшкөн бардык арыздар кабыл алынбайт. Буга ылайык кылмыш иштери негизсиз түрдө иликтенбей калып жатат", — деп билдирет Акыйкатчы институтунун маалымат кызматы.
2015-жылы Акыйкатчы институтуна милиция кызматкерлери доо-арыздарды карабай жаткандыгы тууралуу 316 кат келип түшкөн. Анда жарандар тергөөчүлөрдүн начар иш алып барып жатканын айтып, нааразычылыктарын билдиришкен.
