БИШКЕК, 11-мар. — Sputnik. Премьер-министр Темир Сариев ИИМ башчысы Жогорку Кеңеште өкмөттүн чечимине кайчы маалымат бергенин айтып, буга жол берилбеши керектигин белгиледи.
Өкмөттүн маалымат кызматы билдиргендей бүгүн, 11-март күнү министрлер кабинетинин жыйыны өттү. Анда премьер-министр өкмөт Жогорку Кеңеш менен тыгыз кызматташып, мыйзамдарды кабыл алууда жоопкерчиликтүү мамиле кылышы керектигин билдирди.
Жыйында өкмөт башчы ички иштер министри Мэлис Турганбаев Жогорку Кеңеште өкмөт кабыл алган чечимге кайчы маалымат бергенин айтып, бул боюнча атайын иликтөө болорун, анын жыйынтыгы менен тиешелүү баа берилерин маалымдады.
Буга байланыштуу премьер-министр вице-премьер жана министрлер өздөрү көзөмөлдөгөн мамлекеттик органдарга тиешелүү актуалдуу жана талкуу жараткан маселелер боюнча позицияны кеңешип, координациялоо тапшырмасын берди.
"Конкреттүү маселелер боюнча өкмөттүн фактыга таянган негиздүү, ынанымдуу бирдиктүү позициясы болушу керек. Жогорку Кеңештин жыйындарына мыйзам долбоор боюнча өкмөттүн расмий өкүлү катары дайындалган жетекчи жана адистерди жиберүү зарыл", — деди Сариев.
Ошондой эле премьер-министр өкмөт мүчөлөрү жана агенттиктердин жетекчилери парламенттин тармактык комитеттери менен кызматташууну жеке өздөрү уюштуруп, көзөмөлгө алуу зарылдыгын кошумчалады.
