БИШКЕК, 11-мар. — Sputnik. Алты күн мурда жоголуп кетти делген студент кыздар аман-эсен. Кыздар курбуларыныкында болушу мүмкүндүгүн алардын досу Нурсултан Кадырбеков Sputnik Кыргызстан маалымат агенттигине билдирди.
Буга чейин социалдык тармактарда Кыргызстан-Россия Славян университетинин студенти Айжан Суранбекованын жоголгонун туугандары жазышкан. Кийинчерээк анын досу Мээрим Мырзабекованын (ал дагы КРСУнун студенти) да жоголгону маалым болгон. Шаардык милиция издөө иштерин баштаган болчу.
"Бизге телефон чалган Айжандын таанышы кыздар менен телефондон сүйлөшкөнүн билдирди. Ал дос кызы Мээрим экөө курбусунун үйүндө экенин, ЖМКларга чыгып кеткен маалыматтан улам, үйүнө баруудан коркуп жатканын айтты", — дейт Кадырбеков.
Айжандын дагы бир курбусу аны менен телефондон сүйлөшкөнүн диктофонго жаздырып алганын билдирген.
"Мен аны уктум. Үн Айжандыкы экен. Анын коопсуз жайда экенине ынандык", — деди Кадырбеков.
Учурда кыздардын турган жерин шаардык милиция уюлдук телефондун сигналы аркылуу аныктаганга аракеттенип жатат.
"Биз да чакан иликтөө жүргүздүк. Айжан жашаган үйүнүн жанында 5-марттан 6-мартка караган түнү болгон. Бирок, үйүнө кирген эмес. Такси чакырган. Айдоочу аны дос кызы Мээрим жашаган аймакка жеткирген", — деди Кадырбеков.
Ушундан кийин эки студент кыз жоголуп кеткен. Ал эми Мээрим аттуу кыз үйүнөн эмнеге чыгып кеткенин Кадырбеков түшүндүрүп бере алган жок.
Буга чейин Айжандын туугандары социалдык тармакка Москвадан учуп келген апасы өзүн жаман сезип, ооруканага түшкөнүн жазышкан эле.
