БИШКЕК, 11-мар. — Sputnik. Бүткүл дүйнөлүк футбол федерациясы (FIFA) Кыргызстандын футбол федерациясынын ийгиликтерин баалаган макала жарыялады.
Анда уюмдун өнүгүү программасы тууралуу сөз болуп, өз кызматкерлерин өнүктүрүү жана алардын эффективдүүлүгүн арттыруу боюнча жасалып жаткан аракеттерге жакшы баа берилген. FIFAнын өнүгүү программасынын жардамы менен уюм өзүнүн ишмердигин коммерциялык жана уюштуруучулук жактан жакшы жолго коё алган.
Бүткүл дүйнөлүк футбол федерациясынын маалыматы боюнча КР футбол федерациясы бул убакыт ичинде 362 миң доллар киреше тапкан. Бул чакан уюм үчүн жакшы жетишкендик экени макалада белгиленет.
КР Футбол федерациясынын башкы катчысы Дастан Конокбаев өнүгүү программасына кошулуп жатып, кыска убакыт ичинде ийгиликке жетишебиз деп ойлобогонун айтат.
"Кирешенин басымдуу бөлүгүн (156 миң доллар) федерация жарнамадан тапкан. Мындай ийгиликке профессионалдык маркетинг бөлүмүнүн иш-аракети аркылуу жеткенибизди баса белгилөө керек. Дал ушул маркетинг программасын өнүктүрүү аракети 2014-жылдын апрелинде сунушталган. Кыска убакыт ичинде бул кадам ийгилик алып келе баштады", — дейт Конокбаев.
2015-жылдын ноябрь айында Кыргызстан FIFAнын рейтингинде 2006-жылкы рекордун жаңылап, 119-орундан 108-орунга көтөрүлө алган.
Кыргызстандын курама командасы 2018-жылы боло турчу дүйнөлүк чемпионаттын жана 2019-жылы болчу Азия чемпионатынын тандоо турларында "В" тайпасында ойногон. Өз тайпасында ал учурда үчүнчү орунда турат. Анын 2019-жылы боло турчу Азия чемпионатына жолдомо алууга чоң мүмкүнчүлүгү бар.
