БИШКЕК, 11-мар. — Sputnik. Иш издеп, сойкуканага кабылган кыз учурда эки айга камакка алынганын Акыйкатчы институту билдирди.
Маалыматка ылайык, аталган жаран мекемеге арыз менен кайрылып, январдын соңунда жумуш издеп Ош базарына келгенин айтат. Ошол жерден массажист талап кылынат деген жарнама менен көрсөтүлгөн дарекке барып, сойкуканага кабылган.
"Кызды шаардын Бөкөнбаев жана Совет көчөлөрүнүн кесилишинде жайгашкан үйлөрдүн биринен Мека аттуу аял тосуп алып, сойкулук менен алектенүүсү керектигин айткан. Макул болбогон соң аны бир бөлмөгө камап коюшкан. Кыз түнкү саат төрттө кийимдерин таппай, башка бирөөнүн өтүгүн кийип качып чыккан", — деп айтылат билдирүүдө.
Бирок бир нече күндөн кийин кызды Ош базарынын жанынан күч менен автоунаага отургузуп, Биринчи Май райондук ИИБге алып келишкен. 6-февраль күнү сот аны эки айга камакка алуу чечимин чыгарган.
Сүйлөшүү учурунда кыз бирөөнүн беш миң сомдук өтүгүн кийип кеткени үчүн камакка алынганы белгилүү болду.
Аталган мекеменин кызматкерлери сотто айыпталуучунун кызыкчылыгын көздөй турган адвокат жалдоого жардам бермей болушту.
Учурда ишти Биринчи Май РИИБдин тергөө бөлүмү иликтеп жатат.
