БИШКЕК, 10-мар. — Sputnik. 17 жаштагы Назбийкени такай сабап келген деп шектелген ата-энесине Сузак РИИБ тарабынан кылмыш иши козголуп, тергөө жүрүп жатканын Акыйкатчы институтунун маалымат кызматы билдирди.
"Былтыр ноябрь айында кыз Бишкекке качып келген. Ал реаблитациялык борборлордун бирине жайгаштырылган. Кийин ата-энеси келип ага кол көтөрбөй турганын айтышып, алып кеткен. Бирок, ата-энеси кайтадан сабап баштаганда январь айынын аягында Бишкекке качып келген", — деп айтылат маалыматта.
Акыйкатчы аппаратынын кызматкерлеринин жардамы менен 17 жаштагы Назбийке Ош шаарындагы "Ак-Жүрөк" кризистик борборго жайгаштырылып, психологиялык жана укуктук жардамдар берилген. Бирок, кыздын өз каалоосу менен кийин Бишкектеги кароосуз калган балдардын реаблитациялык борборуна которулган. Психологдор менен социалдык кызматкерлер ага керектүү жардамдарды беришкен.
