Sputnik улуттук музыкалык аспаптар боюнча интерактивдүү инфографика даярдады

БИШКЕК, 10-мар. — Sputnik. Sputnik Кыргызстан радиосу жана маалымат агенттиги Кыргызстандагы быйылкы Тарых жана маданият жылына карата кыргыздын улуттук музыкалык аспаптары боюнча интерактивдүү инфографика даярдады. 

Бул эмгектен кыргыздын байыртадан бери келе жаткан музыкалык аспаптарынын түзүлүшү, тарыхы туурасында маалымат алып, кандай аваз менен жаңырарын угууга болот. Аваздарды (музыкаларды) кыргыздын салттык музыкасынын аткарылышы, таралышы боюнча көч башында келе жаткан "Камбаркан" фольклордук-этнографиялык ансамбли, Токтосун Тыныбеков атындагы Жалал-Абад облустук филармониясынын "Керней-сурнай" тобу жана жетигенчи Жусуп Айсаев аткарды. Андан сырткары, 1974-жылы чыккан "Кыргыз музыкасынын антологиясы" пайдаланылды. 

Тексттик материалдар профессор, музыка таануучу Балбай Алагушевдин "Кыргыздын музыкалык аспаптарынын антологиясы" китебинин негизинде жасалды. "Камбаркан" фольклордук-этнографиялык ансамблинин жетекчиси Рысбек Жумакуновдун эксперттик пикири пайдаланылды.

"Sputnik Кыргызстан чындыгында эле музыкалык уникалдуу колдонмо түзүп чыкты. Бул өлкөбүздүн жаш муундары, дегеле кыргыз музыка өнөрүнө кызыккан жалпы жарандар үчүн Интернет айдыңында кенен-кесири тааныша турган эмгек болду", — деп белгиледи Жумакунов.

Sputnik (sputniknews.com) — ондогон өлкөлөрдө мультимедиялык маалыматтык хабдарга ээ маалымат агенттиги жана радио. Sputnik өзүнө сайттарды, аналогдук жана санарип радиоберүү, социалдык тармактарда баракчаларды камтыйт. 

Дүйнөнүн ар кыл бурчундагы Sputnik агенттиктеринин жаңылыктар түрмөгү күнү-түнү англис, испан, араб, кытай тилдеринде чыгат. Вашингтондогу, Каирдеги, Пекиндеги жана Монтевидеодогу аймактык редакциялар жаңылыктарды үзгүлтүксүз чыгарып туруу үчүн 24/7 режиминде иш алып барат.

Sputnik Кыргызстан агенттигинин интерактивдүү инфографикасынан кыргыздын 11 музыкалык аспабы кандай жаңырарын угуп көрүңүз>>