БИШКЕК, 29-фев. — Sputnik. Кыргызстанда бүгүнтөн баштап өмүр бою эркинен ажыратылган жарандар үчүн өзгөчө режимдеги колония иштей баштаганын Жаза аткаруу мамлекеттик кызматы билдирди.
Мекеме Сокулук районунун Жаңы-Жер айылындагы №19 түзөтүү колониясынын базасында түзүлгөн.
Учурда алты соттолгон жаран №1 тергөө абагынан жаңы түрмөгө алып келинди. Алгач алар медициналык кароодон өтүп, биометрикалык маалымат тапшырып, жаңы кийимге ээ болушту.
№19 түзөтүү колониясынын башчысы Жаныш Сакеловдун айтымында, камераларга жаңы эмерек коюлуп, жаңы жууркан-төшөк, идиш-аяк менен камсыз болушту. Кылмыш жаза кодексине ылайык, кылмышкерлер үчүн камераларга телевизор коюуга уруксат берилет.
Учурда кыска мөөнөттүү жолугушуулар үчүн жайдын курулушу аяктап бара жатканы белгилүү болду.
Кыргызстанда 306 адам өмүрүнүн акырына чейин эркинен ажыратылган. Анын 56 пайызы биринчи ирет соттолуп жаткандар.
