БИШКЕК, 29-фев. — Sputnik. Республиканын футбол боюнча курама командасынын Red Falcons ("Кызыл шумкарлар") деп аталган фанаттык кыймылы Тажикстан — Кыргызстан беттеши өтө турган Душенбе шаарына барууга даярданып жатканын Sputnik маалымат агенттигине кыймылдын мүчөсү Эсеннур Алмазбеков билдирди.
2018-жылы өтө турган Дүйнө чемпионатынын тандоо турунун алкагындагы акыркы оюн 29-март күнү Душанбеде өтөт. Red Falcons кыргызстандык команданы колдогон күйөрмандарды кошо барууга чакырат.
Алдын ала жүргүзүлгөн эптөөлөр боюнча сапар үчүн бир кишиге сегиз миң сом керектелет. Ага жол кире, тамак-аш жана жаткан жери кирет.
"Mercedes" үлгүсүндөгү микроавтобус менен барабыз. Учурда 10 кишинин бара турганы аныкталды", — деди Алмазбеков.
Ал эгер фанаттардын саны көбөйө турган болсо кошумча унаалар уюштурула турганын белгиледи.
Кыргызстандын курама командасынын активинде 11 упай топтолгон. "В" тайпасында биринчи орунда 15 упай менен Австралиянын курама командасы келе жатат. 13 упай менен иорданиялыктар экинчи сапта турат. Кыргызстандык команда үчүнчү орунда турса, төртүнчү орунда Тажикстан (5 упай), андан кийин Бангладеш (1 упай) командалары келе жатат.
Дүйнө чемпионатынын финалдык бөлүгү 2018-жылы Россияда өтөт.
