БИШКЕК, 29-фев. — Sputnik. Кыргызстандык сууда сүзүүчүлөр Берлинде өтүп жаткан "Berolina Cup 2016" өспүрүмдөр арасындагы мелдешинин экинчи күнүндө он алтын медаль алышканын аталган спорттун түрү боюнча федерация билдирди.
Маалыматка ылайык, биринчи күнү кыргызстандык спортсмендер төрт алтын медаль тагынышкан.
Экинчи күндүн жыйынтыгы боюнча сууда сүзүүчүлөр 50 метр аралыкка эки колду тең ыргытып сүзүү боюнча Дарья Таланова жана Кристина Панасенко биринчиликти багынтышкан.
Ал эми Денис Петрашов ушул эле аралыкта брасс жана баттерфляй ыкмасы менен сүзүүдө алтын тагынды.
Дагы бир спортчу Рамазан Тайматов 17-18 жаштар арасында брасс боюнча алтын тагынса, Никита Пауков 15-16 жаштар арасында 100 метрдик чалкасынан сүзүү боюнча мыкты болду. Муну менен бирге Иван Пантелеев чалкасынын сүзүү боюнча 100 метрлик аралыкта биринчиликти багынтты.
Станислав Карнаухов 100 метрлик аралыкта эркин сүзүү боюнча алтынга татыктуу болсо, ушул эле түр боюнча 15-16 жаштар арасында алтын медалды Темирлан Каратаев илип кетти.
Мындан сырткары, 12 жашар Елизавета Рогожникова чалкасынан сүзүү боюнча 100 метрлик аралыкта күмүш тагынса, Асылбек Усенканов 100 метрлик эркин сүзүү боюнча 17-18 жаштар арасында экинчиликти багынтты.
Спортчулар Артем Камарда, Станислав Карнаухов, Асылбек Усенканов жана Темирлан Каратаевдер 4х50 форматы боюнча эркин сүзүүдөгү эстафетада коло медаль тагынышты.
Мелдештин жыйынтыгы боюнча кыргызстандыктар 24 медаль тагынышты. Алардын ичинен 14 алтын, төрт күмүш жана алты коло медаль бар.
