Кадыров иттерди Ысык-Көл облусунун Тоң районунда багат. Анын Буран аттуу дөбөтү ит талаш боюнча мелдеште Кыргызстандын эки жолку чемпиону болгон. Учурда Кадыров анын тукумун алып калуу максатында, күчүктөрүн да багып, өстүрүп жатат.
"Бул эки күчүк — Ак таман менен Ак жал ошол Бурандын тукуму. Кыргыз дөбөттөрү саналуу эле калды. Элдин көбү аны жакшы тааныбайт. Андыктан алар мен кыргыз дөбөтүн багып жатам деп ойлойт", — дейт ал.
Кадыров кыргыз дөбөтүн каалаган багытта үйрөтсө болорун айтат. Кааласа үй кайтартып, кааласа жан сакчы кылып да алып жүрсө болот. Ошондой эле, ал тоолуу аймакта мал кайтартса чабанга жакшы жардамчы болуп чыга келерин билдирди.
"Өзүнүн табиный турпаты биздин мал чарбачылыгыбызга ылайыктуу. Суукка чыдамдуу келет. Адамдын эң жакын досу", — деди ал.
Бул иттин башкалардан айырмасы көлөмү жана көөдөнү чоң келет. Кадыров бекеринен аны бөрү басар деп аташпаарын белгилейт.
"Булар тоо-ташта мал менен жүрүп өпкөлөрү аябай чоң келет. Денесинин чоң болушу карышкыр менен тең тайлаша алышканга абдан ыңгайлуу", — дейт ал.
Кыргыз дөбөтү башка чоң иттердей ажылдап үрө бербейт. Өзүн бир калыпта алып жүрөт жана ээсине абдан берилип кызмат кылат.
