БИШКЕК, 15-фев. — Sputnik. Фучик сейил багындагы 20 дарактын кыйылышы боюнча ыкчам комиссия түзүлгөндүгү тууралуу Бишкек мэриясынын маалымат кызматы билдирди.
Буга чейин сейил бактагы мыйзамсыз кыйылган 20 даракка Экологиялык жана техникалык коопсуздук боюнча мамлекеттик инспекциясы тарабынан акт түзүлгөн.
Аталган факты боюнча түзүлгөн комиссиянын курамына прокуратура, "Зеленстрой" муниципалдык ишканасы жана Ленин райондук ички иштер башкармалыгынын кызматкерлери киргендиги маалыматта белгиленет.
Учурда Ленин райондук ички иштер башкармалыгы тарабынан ыкчам иликтөө иштери жүргүзүлүп жатат.
Ал эми "Зеленстрой" муниципалдык ишканасы тарабынан келтирилген чыгымдын баасы эсептелинүүдө.
Белгилей кетсек, 2015-жылы Фучик сейил багындагы жерлердин менчикке берилиши канчалык деңгээлде мыйзамдуу экенин аныктоо үчүн райондук администрация Ленин райондук прокуратурасына кат жөнөткөн.
