БИШКЕК, 12-фев. — Sputnik. Түркиянын президентинин администрациясындагы булак россиялык пранкерлердин Эрдоган менен сүйлөштүк деген билдирүүсүн четке какканын РИА Новости билдирди.
Интернетте Вован жана Лексус деген каймана ат менен белгилүү болгон россиялык пранкерлер Владимир Кузнецов жана Алексей Столяров өздөрүн Украинанын президенти Петр Порошенко жана премьер-министри Арсений Яценюк деп тааныштырып, Түркиянын президенти Режеп Тайип Эрдоган менен телефон аркылуу сүйлөшкөнүн билдиришкен.
"Мен мындай телефон сүйлөшүү тууралуу укканым жок. Себеби, президентке телефон чалып сүйлөшүү дээрлик мүмкүн эмес. Мен муну жасалма деп ойлойм. Анткени мындай сүйлөшүүлөргө атайын каналдар менен аракеттер көрүлөт", — дейт булак.
Телефондук сүйлөшүүнүн айрым бөлүктөрүн Кузнецов YouTube каналына жайгаштырган. Тамашанын толук версиясын 12-февралда чыгара тургандыктарын белгилешүүдө.
