БИШКЕК, 11-фев. — Sputnik. Социалдык тармак аркылуу ата-энеси изделип жаткан бөбөктөрдү атасы 21-январда Кароосуз калган балдарды реаблитациялоо борборуна алып келип тапшырып кеткен. Бул боюнча борбордун социалдык кызматкери Валерия Попель Sputnik Кыргызстан маалымат агенттигине билдирди.
Белгилей кетсек, Facebook социалдык тармагынын колдонуучулары жана бир катар ЖМКлар Бишкектеги Кароосуз калган балдарды реаблитациялоо борборуна Эржан жана Эмелис аттуу балдар алып келингенин, алардын ата-энеси тууралуу толук маалымат жок экенин жазышып, ата-энесин издөө кызуу талкууга алынган.
Попелдин айтымында, борборго Жалал-Абад облусунун Токтогул районунун тургуну, 2008-жылы, 2011-жылы жана 2013-жылы төрөлгөн үч баласын алып келип тапшырган.
"Дайыржан, Эмелис жана Марлис аттуу балдар борборго атасынын арызы менен келип түшкөн. Апасы балдарынан расмий түрдө баш тарткан кагазын күйөөсүнө жазып бериптир. Ал аялды көргөн жокпуз. Атасы балдарын жалгыз бага албагандыктан бизге убактылуу таштады. Ал акча табуу үчүн чет жакка кетип жатканын айткан", — дейт Попель.
Социалдык кызматкер реаблитациялык борборго балдарды эң көп дегенде жарым жылга гана калтырууга болорун белгиледи.
"Эгер жарым жылдан кийин ата-энеси кайтып келбесе, бөбөктөрдү башка интернатка жайгаштыруу боюнча чаралар көрүлөт. Ал эми туугандары табылып калса алардын камкордугуна беребиз", — деди ал.
Валерия Попель балдардын атасы башында келип кетип жүргөнүн, бирок акыркы эки жумадан бери каттай электигин, бөбөктөр башка балдар менен сүйлөшүп, көнүп калганын кошумчалады.
