БИШКЕК, 11-фев. — Sputnik. Билим берүү жана илим министрлиги өз сайтына мектептердин картасын жайгаштырганын мекеменин жетекчиси Элвира Сариев Facebook тармагындагы баракчасына жарыялады.
Анын айтымында, төлөм маселесин талкуулоо учурунда ата-энелер мектеп боюнча маалымат жеткиликсиз экенин айтышкан. Мында негизинен бюджеттик каржылоо боюнча маселе козголгон.
Министр мындан кийин мектептер инвентаризациядан өткөнүн кабарлайт.
Мектептердин картасы министрликтин edu.gov.kg дарегиндеги сайтына жарыяланган. Сариева кийин карта курулуш жана ремонт, мамлекеттик каржылоо боюнча маалымат менен толуктала турганын белгиледи.
"Мектеп тууралуу маалымат канчалык ачык-айкын болсо, ата-энелердин баасы ошончо объективдүү болот", — деп жазат министр.
Жыл аягына чейин картага бала бакча, ЖОЖ жана башка билим берүү мекемелер боюнча маалымат жарыяланмакчы.
