БИШКЕК, 11-фев. — Sputnik. Вашингтондо АКШнын аскер-аба күчтөрүнүн бюджети боюнча өтүп жаткан маалымат жыйын учурунда генерал-майор Жеймс Мартин күтүүсүз эс-учун жоготуп жыгылды. Бул тууралуу Washington Times жазып чыкты.
Басылма жолугушуу алдында өзүн начар сезип жатканын айтып, бирок ага карабастан жыйынга барганын маалымдоодо.
Генерал бир нече суроого жооп берүүгө үлгүргөн. F-35 реактивдүү учагын каржылоо программасы тууралуу суроо берилгенде жыгылып кеткен. Аны АКШнын аскер-аба күчтөрүнүн башчысынын орун басары Кэролайн Глисон колунан кармап калууга үлгүргөн. Генералды госпиталга алып кеткенден кийин маалымат жыйынды Глисон улантты.
Washington Times Мартин ооруканага жаткырылып, учурда абалы жакшы экенин белгилейт.
