БИШКЕК, 9-фев. – Sputnik. Ысык-Көл облусунун Түп райондук төрөтканасында ымыркайды туура эмес дарылоого шектелген дарыгерлерге каршы митинг өтүп жаткандыгы тууралуу жабырлануучу Мадина Муратбекова Sputnik Кыргызстан агенттигине билдирди.
Эске салсак, кош бойлуу Мадина Муратбекова 24-ноябрь күнү Түп райондук төрөтканага жаткырылып эртеси кыздуу болгон. Ымыркай дени сак төрөлгөнү менен беш күндөн кийин абалы начарлап, облустук ооруканага которулат. Жыйынтыгында, ымыркайдын абалы начарлап чарчап калат. Жабырлануучунун айтымында, ымыркайга камфордук спирт сүйкөлүп, жылыткычка жакын кармалгандыктан денесинен күйүк алган. Бул боюнча Муратбекованын туугандары кылмыш иш козголушун талап кылат.
"Караколдогу ооруканага барганда андагы дарыгерлер ымыркайдын абалы өтө начар экенин билдирип, үч күн мурун эле которуу керек экенин айтышты. Кызыма туура эмес дары сайып, дарылашканын да тастыкташты", — дейт Муратбекова.
Кызымдын денесине камфордук спирт сүйкөп жылыткычка жакын кармашкан, — деген жабырлануучу төрөттү кабыл алган Назгүл Рысбаева аттуу дарыгер ага атайылап жыныстык органдар аркылуу жугуучу "гонорея" оорусу менен ооруйт деген жалган диагноз чыгарып, оорунун вирусу ымыркайга залакасын тийгизген деген шылтоо менен өз күнөөсүн мойнунан алдыруу аракетин жасаганын айтат.
"Мен төрөтканага жаңы келгенде анализдерим таза чыккан. Кийин облустук ооруканага которулуп жатканда дагы бир ирет мазок алып, "гонорея" менен ооруйт деген диагнозду таркатышты. Жолдошум экөөбүз жеке менчик ооруканага барып текшерилсек бардыгы таза чыкты", — деген Муратбекова жыныстык жактан жугуучу оору менен жабыркайт деген маалымат айылга таркап кеткендиктен элден уялып, жаман абалда калганын айтат.
Жабырлануучу өзүндөгү далилдердин бардыгын төрөттү кабыл алган Рысбаевага көрсөтүп, "күнөөнү моюндайсыңбы" десе бир сөз айтпастан башын ийкеп коомдук теле аркылуу кечирим суроого даяр экенин билдирген. Мындан сырткары, адвокат аркылуу канча акча болсо да берүүгө даяр экендигин байма-бай айттырганын жабырлануучу тастыктады.
Бирок, күнөөнү моюндагансып башын ийкегени менен Рысбаева жабырлануучуга "гонорея" диагнозун чыгарбагандыгын айткан.
"Диагнозду чыгарган эмесмин деген Рысбаева күнөөнү лаборант кызга жүктөй баштады. Ал кызга кайрылсак, "мен сизден мазок алган эмесмин да, болгону жыйынтыгын чыгарып бердим" деп айтты. Чынында эле анын тиешеси жок, анткени мазокту Рысбаева менден өзү алган", — деп кошумчалайт жабырлануучу.
Учурда Түп райондук төрөтканасынын алдына эл чогулуп митинг өтүп жатат. Анда башкы дарыгер менен Назгүл Рысбаеванын иштен кетиши талап кылынууда.
Дарыгер Назгүл Рысбаева Sputnik Кыргызстан агенттигинин журналистине күнөөлүү эмес экенин айтып, эч кандай комментарий бере албай тургандыгын билдирди.
"Бул иш боюнча мен эч кандай комментарий бере албайм", — деп дарыгер башка суроолорго жооп берүүдөн баш тартты.
Ал эми бул иш боюнча иликтөө ишин жүргүзгөн тергөөчү чалууларга азырынча жооп бербей жатат.
