БИШКЕК, 8-фев. — Sputnik. Бюджеттик ачыктыкты камсыз кылууну күчөтүү керектигин премьер-министр Темир Сариев Финансы министрлигинин коллегиялык жыйынында билдирди.
Анын айтымында, Кыргызстан — Борбор Азия мамлекеттеринин ичинде эң ачык саясат жүргүзгөн өлкө. Сариев анын ичинде бюджеттин ачыктыгын камсыз кылуу боюнча бир топ иштер аткарылып жатканын жана аларды улантуу керектигин талап кылды.
"Бул жаатта Финансы министрлигине эң жогорку талаптар коюлган. Аны кемчиликсиз түрдө аткаруу керек. Мамлекеттик сатып алуудагы ачыктык-айкындык камсыз кылуу боюнча электрондук түрдө жүргүзүлүп жатат. Анын эсебинен 6 миллиард сомго чейин үнөмдөлгөнү белгилүү болду. Биз муну менен токтоп калбастан, дагы жакшыртууга бет алышыбыз керек", — деди Сариев.
Премьер-министр мамлекеттик сатып алуудагы коррупциялык иштерди кыскартуу боюнча дагы жаңы ыкмаларды киргизип, жергиликтүү бийлик органдары менен тыгыз иш алып барууну тапшырды.
"Жер-жердеги нааразычылыктар мамлекеттик сатып алуудагы туура эмес иштерден чыгып жатат. Сатып алуулардын ачык-айкындыгын камсыз кылуу менен алынган жабдыктардын сапатына көзөмөл кылуу керек", — деди Сариев.
Өкмөт башчы Евразия экономикалык биримдигинин алкагында аукциондорго Кыргызстандык ишкерлердин катышышы үчүн шартты түзүүнү эртелетүү тапшырмасын берди. Мамлекеттик сатып алуулар департаментинин директору Улан Даникеев ишкерлер мындай практика кийинки жылдан тарта киргизилерин билдирди.
