БИШКЕК, 8-фев. — Sputnik. "Кыргызнефтегаз" мамлекеттик ишканасы атайын техника сатып алуу келишиминин негизинде мыйзамсыз акча которуу менен мамлекетке 7 миллион 973 миң сомго (7 миллион 248,2 миң рубль) зыян келтирген. Бул тууралуу Мамлекеттик коопсуздук кызматы билдирди.
Маалыматка ылайык, 2014-жылдын июль айында "Кыргызнефтегаз" жана россиялык "Спецсервис" ишканалары атайын техника сатып алуу боюнча түзгөн келишимге "Спецсервис" "Банк АКЭФ" аркылуу кепилдигин берген.
"Спецсервис" ишканасынын өтүнүчү менен "Кыргызнефтегаз" ишканасы калган эки миллион 294,4 миң рублду да которгон.
Бирок кепил болгон "Банк АКЭФ" 2012-жылы атын өзгөрткөндөн кийин кепилдик жасалма экендиги белгилүү болгон. Натыйжада "Спецсервис" аталган банктын кардары эмес экени аныкталып, 7 миллион 973 миң сомдук техника "Кыргызнефтегазга" жеткирилген эмес.
Аталган факты боюнча Кылмыш кодексинин "Алдамчылык" жана "Жасалма документтерди пайдалануу" беренелери боюнча кылмыш иши козголуп, тергөө иштери жүрүп жатат.
