БИШКЕК, 27-янв. — Sputnik. Кыргызстандын туңгуч президенти Аскар Акаев Кыргызстанга келе турган болсо Башкы прокуратура суракка чакырат. Бул тууралуу Sputnik Кыргызстанга Башкы көзөмөлдөөчү органдын маалымат кызматынын өкүлү Нурлан Тагаев билдирди.
Эске салсак, Аскар Акаевдин агасы Асанкул Акаев кечээ, 26-январь күнү Бишкекте Президенттин иш башкармалыгынын атайын ооруканасынада 77 жаш курагында каза болду. Маркумдун сөөгү эртең өзүнүн туулуп-өскөн айылы Кемин районундагы Кызыл-Байрак айылына коюлат.
"Туңгуч президент Кыргызстанга келе турган болсо сөзсүз түрдө "Кумтөр", Beeline жана башка маселелер боюнча суракка алынат. Камакка алынаары же алынбаары сурактан кийин белгилүү болот", — деп билдирет Тагаев.
Аскар Акаев 2005-жылкы жоогазын революциясынан кийин Кыргызстандан чыгып кеткен, учурда Москва шаарында жашап мамлекеттик университетте сабак берет.
