БИШКЕК, 22-янв. — Sputnik. Бишкек шаардык Ички иштер башкармалыгы жети жыл бою айып короо жайларын эки жеке ишканага ижарага мыйзамсыз берип, андан мамлекетке беш миллион сомдон ашуун зыян келтирген. Бул тууралуу УКМКнын маалымат кызматы билдирди.
Маалыматка ылайык, 2007-жылы чыккан Бишкек мэриясынын токтому боюнча Горький жана Фучик көчөлөрүндө жайгашкан унаа токтотуучу жайлар ШИИБдин МАИ кызматынын балансына берилип, үчүнчү жактарга берүүгө тыюу салынган.
"Башкармалыктын кызматкерлери эч кандай макулдашуусуз, мыйзам бузуу менен эки жеке компанияга аталган жайларды ижарага берип койгон. Мындан улам, мамлекеттик казынага төлөнбөй калган ижара суммасы беш миллион 471,7 миң сомду түзгөн",— деп айтылат таратылган маалыматта.
Бул боюнча УКМКнын тергөө комитети тарабынан кылмыш иши козголуп, учурда тергөө амалдары жүрүп жатканы маалымдалды.
