БИШКЕК, 13-янв. — Sputnik. Кыргыз-орус өнүктүрүү фонду мамлекеттик кызматкерлер үчүн ипотекалык турак жай курууга жардам берет. Аталган фонд бул боюнча Нарын жана Талас облусунун жетекчилери менен жолукканын мекеменин маалымат кызматы кабарлады.
Билдирүүгө ылайык, тараптар ар бир аймактын жеткиликтүү турак жайга муктаждыгын талкуулап, анын курулушу боюнча кызматташуу маселелери ортого салынды.
Кыргыз-орус өнүктүрүү фонду былтыртан баштап өкмөттүн мамлекеттик кызматкерлер үчүн жеткиликтүү ипотека берүү программасын колдоо максатында турак жай курулуш базарын иликтеп келген.
Натыйжада учурда аталган фонд республиканын бардык дубандардын жетекчилери менен жолугуп, жакын арада курулуш иштерин баштоого белсенип жатат.
