БИШКЕК, 13-янв. — Sputnik. Ар бир мектепте балдардын саламаттыгына көз салуучу дарыгер болуусу керектигин премьер-министр Темир Сариев медико-социалдык экспертиза жаатын реформалоо боюнча жыйында билдирди.
Эмгек жана социалдык өнүгүү министрлигинин маалыматына ылайык, мүмкүнчүлүгү чектелген жарандардын саны 168 миңди түзсө, анын 27 миңи – балдар.
Сариев балдардын ден-соолугуна тийиштүү кам көрүлүшү зарыл экенин, саламаттык сактоо тутуму эне жана баланын ден-соолугуна байланыштуу көйгөйлөрдү чечүү мүмкүндүгүн толук пайдаланбай жатканын белгиледи.
"Учурда Кыргызстанда 2 миң 233 мектеп бар, анын ар биринде жылына бир ирет балдарды кароодон өткөрүп туруучу дарыгер иш алып баруусу керек. Бул тутумду милдеттүү түрдө киргизүү зарыл. Өсүп келе жаткан муундун ден-соолугу чың болсо, жалпы улуттун да саламаттыгы бекем болот", — деди премьер-министр.
Жыйын жүрүшүндө Сариев Эмгек жана социалдык өнүгүү министрлигине медико-социалдык экспертиза тутумунда иш жүзүндө пайдалануу үчүн майыптуулукту баалоо боюнча анкеталарды адаптациялоо боюнча иш алып барууну тапшырды. Ошондой эле медико-социалдык эксперттик комиссияларга врач-реабилитолог кызматын киргизүү тууралуу өкмөттүн токтом долбоорун сунуштоо милдеттендирилди.
