БИШКЕК, 13-янв. — Sputnik. Бензин ташып баратып оодарылып калган автоунанын айдоочусу качып кетикенин Жайыл районунун Талды-Булак айыл өкмөтүнүн башчысы Жеңиш Айдарбаев Sputnik Кыргызстан маалымат агенттигине билдирди.
12-январында саат 11.48 чамасында Бишкек — Ош унаа жолунун 116-чакырымында (Жайыл району) "ДАФ" үлгүсүндөгү май ташуучу унаа 38 тонна күйүүчү май (бензин) алып бара жатып, жолдон чыгып, оодарылып кеткен. Анын кесепетинен Абла суусуна болжол менен 13-14 тонна күйүүчү май төгүлгөн.
Мамлекетик экологиялык коопсуздук боюнча инспекциясынан билдиришкендей, учурда суунун үлгүлөрү лабораториялык анализ үчүн алынды. Эгер кайсы бир тараптын күнөөсү аныктала турган болсо аларга айыптар салынарын кошумчалашты.
Инспекциядан маалымдашкандай, эгер күнөөлүү жеке тарап болсо 10 миң сом, жеке компания болсо 15 миң сом айып салынат. Андан сырткары эгер суудагы балыктардын өлгөнү аныкталса, ар бир балык башына 800 сомдон 2000 сомго чейин айып каралган.
