БИШКЕК, 13-янв. — Sputnik. Чүй облусунда май ташуучу унаа оодарылып, ичүүчү суу убактылуу токтотулганын ӨКМ билдирди.
Маалыматка ылайык, үстүбүздөгү жылдын 12-январында саат 11.48 чамасында Бишкек — Ош унаа жолунун 116-чакырымында (Жайыл району) "ДАФ" үлгүсүндөгү май ташуучу унаа 38 тонна күйүүчү май (бензин) алып бара жатып, жолдон чыгып, оодарылып кеткен. Анын кесепетинен Абла суусуна болжол менен 13-14 тонна күйүүчү май төгүлгөн.
Абла суусу убактылуу токтотулуп, суунун зыяндуулугун аныктоо максатында Мамлекеттик экотехинспекциясы тарабынан үлгү алынып, анын жыйынтыгы чыгарыла элек.
Абла дарыясынын бензин төгүлгөн жеринин төмөн жагынан Талды-Булак айыл өкмөтүнө караштуу Кайырма, Бөксө-Жол, Бекитай айылдары жана Сосновка айыл өкмөтүнө караштуу Сосновка айылдарынын калкы ичүүчү суу менен камсыздалат.
Бүгүн түнү саат 03:00 чамасында менчик крандын жардамы менен унааны жолдон чыгарылды. Кырсыктан унаанын айдоочусу жабыркаган эмес.
