БИШКЕК, 12-янв. – Sputnik. 2015-жылдын 1-февралынан тарта турак-жайды милдеттүү түрдө камсыздандыруу ишке киргизилээрин премьер-министр Темир Сариев "Биринчи радионун" түз эфиринде билдирди.
"Эгерде турак-жай камсыздандырылбаган болсо, анда жаратылыш кырсыгынан, же өрттөн жабыркаган турак-жайлар үчүн мамлекет тараптан каражат берилбейт. Айыл жергесиндегилер турак-жайды камсыздандырууга айына — 50 сомдон, ал эми жылына 600 сомдон төлөшөт. Эгерде турак-жай кандайдыр бир себептер боюнча жабыркаган болсо, мамлекет тараптан 500 миң сом өлчөмүндө камсыздандыруу акысы берилет", — деп билдирди Темир Сариев.
Ал эми шаар жергесинде турак-жайды камсыздандыруу 1200 сом болот. Шаардыктар айына 100 сомдон төлөп турушмакчы.
Өкмөт башчынын билдиришинче, шаар жергесинде турак-жайдын баасы жогору болгондуктан, камсыздандыруу акысы да жогору эсептелет.
"Республикада турак-жайлар көбүнесе айыл жергесинде жабыркайт, калктын 50-60 пайызы айыл жергесинде турат. Турак-жайлар талкаланган учурда мамлекет 200 миң сом өлчөмүндө каражат берүүдө, бирок, бул сумма үй-жайды толугу менен калыбына келтирүүгө жетпейт, ошол эле учурда берилген каражатты кайрадан кайтарып берүүгө туура келет. Ошол себептүү милдеттүү камсыздандыруу тууралуу мыйзам кабыл алынды", — деп билдирди Темир Сариев.
Бул маселеге Сариев өткөн жылы ноябрда Ош обулусунда ноябрь айында болгон жер титирөөнүн чыгымдары жана элге жардам көрсөтүү боюнча парламентте маалымат берип жатканда да токтолгон.
