БИШКЕК, 12-янв. – Sputnik. Узак мөөнөттөн бери баңги затын сатуу менен алектенген Ош шаарынын үч жана Бишкектин бир тургуну борбордун Ибраимов көчөсүнөн кармалды. Бул тууралуу Баңги затты көзөмөлдөө кызматынын маалымат кызматы билдирди.
Кармалгандардын "Тойота" үлгүсүндөгү унаасынан 3,5 миллион сомго бааланган 2 кг 941 грамм героин табылган. Мындан сырткары унаанын арткы отургучтарынан уксустук ангидрид жыттанган полиэтилендик баштык алынган.
Кармалган кылмыштуу топ узак мөөнөттөн бери баңги затты өлкөнүн түштүк аймагынан Бишкек шаары менен Чүй өрөөнүнө ташып келишкени маалыматта белгиленет.
Учурда аталган факты боюнча өкмөткө караштуу баңги затты көзөмөлдөө кызматынын иликтөө бөлүмү тарабынан кылмыш иши козголду.
