БИШКЕК, 2-янв. — Sputnik. "Саякбай манасчы" коомдук фондусу быйыл күзүндө белгилене турган Үркүндүн 100 жылдыгына карата тасма тарта турганын аталган фонддун мүчөсү Улан Исмаилов билдирди.
Анын айтымында, тартылуусуна 200 миң доллар бөлүнгөн тасмага Нурбек Айбашев менен Самат Ибраев продюсерлик кылышат.
"Тартыла турган фильмдин сценарийи даяр. Азырынча режиссер тандала элек. Учурда актерлорго кастинг өтүп жатат. Тасма күзгө жуук даяр болот", — деди Исмаилов.
Маалыматка ылайык, тасма Ысык-Көл менен Кытайдын чектешкен аймагындагы Сырт жайлоосунда жана кытайдын Үрүмчү шаарында тартылышы күтүлүүдө.
